வேல்முருகன் சிஎம் ஆபீஸ் பற்றி சொல்றதை பாருங்க.. ரூ.1200 கோடி? கிருஷ்ணசாமி, பிரேமலதா வேற லெவல் ஐடியா!

சென்னையில் ரூ.1,200 கோடி மதிப்பில் புதிய தலைமைச் செயலகம் மற்றும் சட்டப்பேரவை வளாகம் அமைக்கப்படும் என்று முதல்வர் விஜய் சட்டப்பேரவையில் அறிவித்துள்ளார். தற்போதைய இடநெருக்கடி மற்றும் எதிர்கால நிர்வாகத் தேவைகளை கருத்தில் கொண்டு இந்த புதிய வளாகம் அமைக்கப்பட உள்ளதாக தெரிவிக்கப்பட்டுள்ளது.

இந்த அறிவிப்பு வெளியான நிலையில், அரசியல் கட்சித் தலைவர்கள் மத்தியில் ஆதரவும், விமர்சனங்களும், பல்வேறு யோசனைகளும் முன்வைக்கப்பட்டு வருகின்றன.

ரூ.1,200 கோடி தேவையா? கிருஷ்ணசாமி கேள்வி

புதிய தமிழகம் கட்சித் தலைவர் டாக்டர் கிருஷ்ணசாமி, ரூ.1,200 கோடி செலவில் புதிய தலைமைச் செயலகம் கட்டும் முடிவை கேள்வி எழுப்பியுள்ளார்.

ஏற்கனவே தமிழகத்தில் புதிய சட்டப்பேரவை கட்டப்பட்டு பின்னர் அது மருத்துவமனையாக மாற்றப்பட்டதை சுட்டிக்காட்டிய அவர், ஆட்சி மாறும்போது புதிய கட்டிடத்தையும் அடுத்த அரசு பயன்படுத்தாமல் போகும் சூழல் ஏற்படலாம் என்று தெரிவித்துள்ளார்.

மேலும், தமிழக தலைநகரை சென்னையில் இருந்து திருச்சிக்கு மாற்ற வேண்டும் என்ற கோரிக்கையும் நீண்ட காலமாக இருப்பதால், இந்நிலையில் ரூ.1,200 கோடியை செலவு செய்வது அவசியம்தானா என்றும் அவர் கேள்வி எழுப்பியுள்ளார்.

பிரேமலதாவின் ஐடியா என்ன?

தேமுதிக பொதுச்செயலாளர் பிரேமலதா விஜயகாந்த், புதிய தலைமைச் செயலக திட்டத்தை வரவேற்றுள்ளார்.

அதே நேரத்தில், ஆட்சி மாறினாலும் இந்த கட்டிடத்தை பயன்படுத்துவதை யாராலும் தடுக்க முடியாத வகையில் சட்டப்பாதுகாப்பு ஏற்படுத்த வேண்டும் என்று அவர் யோசனை தெரிவித்துள்ளார்.

மேலும், புதிய தலைமைச் செயலகம் தமிழகத்தின் வரலாறு மற்றும் பாரம்பரியத்தை பிரதிபலிக்கும் வகையில் அமைய வேண்டும் என்றும் அவர் வலியுறுத்தியுள்ளார்.

வேல்முருகன் சொன்னது என்ன?

தமிழக வாழ்வுரிமைக் கட்சி தலைவர் வேல்முருகனும் புதிய தலைமைச் செயலக திட்டத்தை வரவேற்றுள்ளார். ஆனால், அது வெறும் அரசு அலுவலக கட்டிடமாக மட்டும் இருக்கக்கூடாது என்பதே அவரது கருத்தாக உள்ளது.

தமிழர்களின் தொன்மை, பண்பாடு மற்றும் கட்டிடக்கலை மரபை உலகிற்கு எடுத்துக்காட்டும் வகையில் புதிய வளாகம் உருவாக்கப்பட வேண்டும் என்று அவர் தெரிவித்துள்ளார்.

தஞ்சை பெரிய கோவில், மாமல்லபுரம் சிற்பக்கலை, செட்டிநாடு கட்டிடக்கலை போன்ற தமிழகத்தின் பாரம்பரிய அம்சங்களை நவீன தொழில்நுட்பத்துடன் இணைக்க வேண்டும் என்றும் வேல்முருகன் கூறியுள்ளார். கட்டிட வடிவமைப்பை இறுதி செய்வதற்கு முன்பு கட்டிடக் கலைஞர்கள், வரலாற்று ஆய்வாளர்கள், தொல்லியல் வல்லுநர்கள், தமிழ் அறிஞர்கள் உள்ளிட்டோரின் ஆலோசனையை பெற வேண்டும் என்றும் அவர் வலியுறுத்தியுள்ளார்.

விஜய் அரசு என்ன செய்யப்போகிறது?

ரூ.1,200 கோடி மதிப்பிலான இந்த திட்டம் குறித்து தற்போது அரசியல் ரீதியாக பல்வேறு கருத்துகள் முன்வைக்கப்பட்டு வருகின்றன.

செலவு நியாயமானதா என்பது ஒருபுறம் இருக்க, ஆட்சி மாறினாலும் திட்டம் தொடர்ந்து பயன்பாட்டில் இருக்குமா, கட்டிடத்தில் தமிழகத்தின் வரலாறு எப்படி பிரதிபலிக்கப்படும், மக்களின் வரிப்பணம் முழுமையாக பயனுள்ள வகையில் செலவிடப்படுமா என்பதும் முக்கிய கேள்விகளாக உள்ளன.

முதல்வர் விஜய் அறிவித்துள்ள புதிய தலைமைச் செயலக திட்டம், வெறும் கட்டிடத் திட்டமாக இல்லாமல் தமிழக அரசியலில் புதிய விவாதத்தையும் கிளப்பியுள்ளது.