தவெக எம்.எல்.ஏக்களிடம் ரூ.50 கோடி வரை பேரம் பேசுகின்றனர்: அமைச்சர் நிர்மல் குமார் பரபரப்பு குற்றச்சாட்டு

சென்னை:

தமிழக அரசியலில் பரபரப்பை ஏற்படுத்தும் வகையில், தமிழக வெற்றிக் கழக (தவெக) அமைச்சர் சி.டி.ஆர். நிர்மல் குமார் முக்கிய குற்றச்சாட்டை முன்வைத்துள்ளார். தவெக எம்.எல்.ஏக்களை கட்சியில் இருந்து விலகச் செய்யும் நோக்கில் ரூ.10 கோடி முதல் ரூ.50 கோடி வரை பணம் வழங்குவதாக பேரம் பேசப்பட்டு வருவதாக அவர் தெரிவித்தார். கடந்த ஒரு மாதத்திற்கும் மேலாக இந்த முயற்சி தொடர்ந்து நடைபெற்று வருவதாகவும் அவர் கூறியுள்ளார்.

சென்னையில் செய்தியாளர்களை சந்தித்த நிர்மல் குமார், சில அரசியல் பிரமுகர்களின் தூண்டுதலின் பேரில் பல்வேறு நபர்கள் தவெக எம்.எல்.ஏக்களை தனித்தனியாக தொடர்புகொண்டு, பணம் மற்றும் அரசியல் சலுகைகளை வழங்குவதாக கூறி அணுகியதாக தெரிவித்தார். இந்த விவகாரம் தொடர்பாக ஏற்கனவே பல எம்.எல்.ஏக்கள் கட்சித் தலைமையிடம் தகவல் தெரிவித்துள்ளதாகவும் அவர் கூறினார்.

"ஒவ்வொரு எம்.எல்.ஏவையும் தொடர்பு கொண்டுள்ளனர்"

நிர்மல் குமார் கூறுகையில், "எங்களுடைய எம்.எல்.ஏக்களை ஒவ்வொருவராக தொடர்புகொண்டு ரூ.10 கோடி, ரூ.20 கோடி, ரூ.35 கோடி, ரூ.50 கோடி வரை தருகிறோம் என்று தொடர்ந்து பேரம் பேசி வருகின்றனர். கடந்த ஒரு மாதமாக இந்த முயற்சி நடைபெற்று வருகிறது. தொடர்பு கொள்ளப்படாத எம்.எல்.ஏக்களே இல்லை" என்று குற்றம்சாட்டினார்.

மேலும், சில எம்.எல்.ஏக்கள் இந்த பேரத்தை நிராகரித்தபோது, அவர்களிடம் மிரட்டும் தொனியிலும் பேசியதாக அவர் தெரிவித்தார். இதுகுறித்து பாதிக்கப்பட்டவர்கள் காவல்துறையில் புகார் அளித்துள்ளதாகவும் கூறினார்.

மூவர் கைது

புகாரின் அடிப்படையில் காவல்துறை நடவடிக்கை மேற்கொண்டு, இந்த பேரத்தில் ஈடுபட்டதாகக் கூறப்படும் மூன்று பேரை கைது செய்துள்ளதாக நிர்மல் குமார் தெரிவித்தார். கைது செய்யப்பட்டவர்களில் நரேஷ் மற்றும் தியாகராஜன் உள்ளிட்டோர் இருப்பதாகவும், அவர்கள் முக்கிய அரசியல் நபர்களுடன் தொடர்ந்து தொடர்பில் இருந்ததாகவும் குற்றம்சாட்டினார்.

அவர்களது செல்போன் தொடர்புகள் மற்றும் பிற ஆதாரங்களின் அடிப்படையில் விசாரணை நடைபெற்று வருவதாகவும், எவ்வளவு தொகை வழங்க வேண்டும், எந்தெந்த எம்.எல்.ஏக்களை அணுக வேண்டும் என்பது குறித்து திட்டமிட்டு செயல்பட்டதாகவும் அமைச்சர் கூறினார்.

"நம்பிக்கையில்லா தீர்மானத்திற்கு ஆதரவு கேட்கப்பட்டது"

இந்த பேரத்தின் பின்னணியில் அரசியல் நோக்கம் இருப்பதாகவும் நிர்மல் குமார் குற்றம்சாட்டினார். "சபாநாயகர் மீது நம்பிக்கையில்லா தீர்மானம் கொண்டு வரப்படும். அதற்கு நீங்கள் ஆதரவாக வாக்களிக்க வேண்டும்" என்று சில எம்.எல்.ஏக்களிடம் கூறப்பட்டதாக அவர் தெரிவித்தார்.

இதுதொடர்பாக பல தவெக எம்.எல்.ஏக்கள் கட்சித் தலைமையிடம் புகார் அளித்துள்ளதாகவும், ஒருவருக்கு நேரடியாக மிரட்டல் விடுக்கப்பட்டதால் அவர் காவல்துறையிலும் புகார் செய்துள்ளதாகவும் நிர்மல் குமார் தெரிவித்தார்.