வேலூரில் ஐஏஸ் - ஐபிஎஸ் தம்பதிக்கு ஒரே மாவட்டத்தில் பணி.. கணவர் எஸ்பி - மனைவி மாநகராட்சி ஆணையர்

வேலூர் மாவட்டத்தில் ஐஏஎஸ் - ஐபிஎஸ் தம்பதிக்கு ஒரே மாவட்டத்தில் முக்கிய பொறுப்புகள் வழங்கப்பட்டுள்ளன. வேலூர் மாவட்ட காவல் கண்காணிப்பாளராக (எஸ்பி) சிவராமன் ஐபிஎஸ் பணியாற்றி வரும் நிலையில், அவரது மனைவி கேத்ரின் சரண்யா ஐஏஎஸ், வேலூர் மாநகராட்சி ஆணையராக நியமிக்கப்பட்டுள்ளார்.

கணவர் எஸ்பி.. மனைவி மாநகராட்சி ஆணையர்

தமிழகத்தில் 14 ஐஏஎஸ் அதிகாரிகளின் பணியிட மாற்றம் தொடர்பான உத்தரவு வெளியான நிலையில், கேத்ரின் சரண்யா ஐஏஎஸ் வேலூர் மாநகராட்சி ஆணையராக நியமிக்கப்பட்டுள்ளார்.

இதற்கு முன்பு அவர் தமிழ்நாடு தொழில் முன்னேற்ற நிறுவனமான சிப்காட்டின் செயல் இயக்குநராக பணியாற்றி வந்தார். தற்போது வேலூர் மாநகராட்சி ஆணையர் பொறுப்பு அவருக்கு வழங்கப்பட்டுள்ளது.

ஒரே மாவட்டத்தில் இருவரும் முக்கிய பொறுப்பில்

கேத்ரின் சரண்யாவின் கணவர் என்.யு. சிவராமன் ஐபிஎஸ், வேலூர் மாவட்ட காவல் கண்காணிப்பாளராக கடந்த பிப்ரவரி மாதம் நியமிக்கப்பட்டார்.

இதனால் தற்போது கணவர் மாவட்டத்தின் காவல் நிர்வாகத்தை கவனிக்கும் எஸ்பியாகவும், மனைவி மாநகராட்சியின் நிர்வாகப் பொறுப்பை கவனிக்கும் ஆணையராகவும் ஒரே மாவட்டத்தில் பணியாற்ற உள்ளனர்.

வேலூர் மாநகராட்சியின் முதல் பெண் ஆணையர்

கேத்ரின் சரண்யா வேலூர் மாநகராட்சி ஆணையராக பொறுப்பேற்கும் முதல் பெண் அதிகாரி என்ற பெருமையையும் பெறுகிறார்.

வேலூர் மாநகராட்சி கடந்த 2008-ம் ஆண்டு மாநகராட்சியாக மாற்றப்பட்டது. அதன்பிறகு தற்போது முதல் முறையாக பெண் அதிகாரி ஒருவர் ஆணையராக பொறுப்பேற்க உள்ளதாக தெரிவித்துள்ளது.

இருவரும் 2021 பேட்ச் அதிகாரிகள்

சிவராமன் 2021-ம் ஆண்டு பேட்ச் ஐபிஎஸ் அதிகாரி. அவர் விழுப்புரம் மாவட்டத்தைச் சேர்ந்தவர்.

அதேபோல் கேத்ரின் சரண்யாவும் 2021-ம் ஆண்டு பேட்ச் ஐஏஎஸ் அதிகாரி. சென்னை பல்கலைக்கழகத்தில் பயின்றுள்ள இவர், கணிதத்தில் எம்.எஸ்.சி படித்துள்ளார்.

வேலூரில் கவனம் பெற்ற புதிய நியமனம்

மாவட்ட அளவில் சட்டம் - ஒழுங்கு மற்றும் காவல் நிர்வாகத்தை சிவராமன் கவனிக்க உள்ள நிலையில், வேலூர் மாநகராட்சியின் நிர்வாகம் தொடர்பான முக்கிய பொறுப்புகளை கேத்ரின் சரண்யா மேற்கொள்ள உள்ளார்.

இதனால் கணவர் எஸ்பி.. மனைவி மாநகராட்சி ஆணையர் என ஒரே மாவட்டத்தில் ஐஏஎஸ் - ஐபிஎஸ் தம்பதி முக்கிய பொறுப்புகளில் பணியாற்றுவது வேலூரில் கவனம் பெற்றுள்ளது.