அரிசி விலை உயர்வுக்கு என்ன காரணம்? அரிசி ஆலை உரிமையாளர்கள் சங்கம் விளக்கம்!

தமிழகத்தில் கடந்த சில வாரங்களாக அரிசி விலை உயர்ந்து வருவது பொதுமக்களிடையே கவலையை ஏற்படுத்தியுள்ளது. சில ரக அரிசிகளின் விலை கிலோவுக்கு பல ரூபாய் உயர்ந்துள்ளதாக வியாபாரிகள் தெரிவித்து வருகின்றனர். இந்த நிலையில், அரிசி விலை உயர்வுக்கான உண்மையான காரணம் என்ன என்பது குறித்து தமிழ்நாடு அரிசி ஆலை உரிமையாளர்கள் சங்கத்தினர் விளக்கம் அளித்துள்ளனர்.

அரிசி தட்டுப்பாடு ஏற்பட்டுள்ளதா?

அரிசி விலை உயர்ந்ததால் தமிழகத்தில் அரிசி தட்டுப்பாடு ஏற்பட்டுள்ளதாக தகவல்கள் பரவி வருகின்றன.

ஆனால், அரிசிக்கு உண்மையான தட்டுப்பாடு இல்லை என அரிசி ஆலை உரிமையாளர்கள் சங்கத்தினர் தெரிவித்துள்ளனர்.

இந்திய அளவில் கடந்த ஆண்டு அரிசி உற்பத்தி அதிகமாக இருந்ததாகவும், நாட்டின் தேவையை பூர்த்தி செய்யும் அளவுக்கு அரிசி இருப்பதாகவும் அவர்கள் கூறியுள்ளனர்.

தமிழகத்தில் மட்டும் உள்ளூர் உற்பத்தி மாநிலத்தின் முழு தேவையையும் பூர்த்தி செய்யாததால், பிற மாநிலங்களில் இருந்து நெல் மற்றும் அரிசி கொண்டு வரப்படுவதாகவும் தெரிவிக்கப்பட்டுள்ளது.

தமிழகத்திற்கு பிற மாநிலங்கள்தான் முக்கிய ஆதாரம்

தமிழகத்தின் ஆண்டு அரிசி தேவையுடன் ஒப்பிடும்போது, மாநிலத்தில் உற்பத்தியாகும் அளவு குறைவாக இருப்பதாக ஆலை உரிமையாளர்கள் சங்கம் தெரிவித்துள்ளது.

இதனால் ஆந்திரா, கர்நாடகா உள்ளிட்ட அண்டை மாநிலங்களில் இருந்து நெல் மற்றும் அரிசி தமிழகத்திற்கு கொண்டு வரப்படுகிறது.

குறிப்பாக தமிழக மக்கள் அதிகம் விரும்பி வாங்கும் மிகச்சன்ன ரக அரிசிகளுக்கு பிற மாநிலங்களை அதிகம் சார்ந்திருக்க வேண்டிய நிலை உள்ளது.

எந்த ரக அரிசி விலை அதிகரித்துள்ளது?

அனைத்து வகையான அரிசிகளின் விலையும் ஒரே அளவில் உயரவில்லை என்பதுதான் அரிசி ஆலை உரிமையாளர்கள் சங்கத்தின் முக்கிய விளக்கம்.

தமிழகத்தில் பொதுவாக மோட்டா ரகம், சன்ன ரகம், மிகச்சன்ன ரகம் என பல வகையான அரிசிகள் பயன்படுத்தப்படுகின்றன.

இதில் தற்போது முக்கியமாக மிகச்சன்ன ரக அரிசியின் விலையில்தான் உயர்வு ஏற்பட்டுள்ளதாக சங்கத்தினர் தெரிவித்துள்ளனர்.

பாபட்லா பொன்னி, சோனா மசூரி உள்ளிட்ட மிகச்சன்ன ரக அரிசிகள் தமிழகத்தில் அதிகம் விரும்பி வாங்கப்படுகின்றன.