ரேடியல் சாலையில் லெஜண்ட் சரவணா பிரம்மாண்ட முடிவு.. 15 லட்சம் சதுர அடியில் சென்னையின் பெரிய ஸ்டோர்

சென்னையின் முக்கியமான வர்த்தக பகுதிகளில் ஒன்றாக வளர்ந்து வரும் பல்லாவரம்–துரைப்பாக்கம் ரேடியல் சாலையில், லெஜண்ட் சரவணா நிறுவனம் பிரம்மாண்டமான புதிய ஸ்டோரை அமைக்க திட்டமிட்டுள்ளதாக தகவல் வெளியாகியுள்ளது.

சுமார் 15 லட்சம் சதுர அடி பரப்பளவில் இந்த புதிய ஸ்டோர் அமைய உள்ளதாக கூறப்படுகிறது. இது செயல்பாட்டுக்கு வந்தால், சென்னையின் மிகப்பெரிய ரீடெயில் ஸ்டோர்களில் ஒன்றாக இருக்கும் என எதிர்பார்க்கப்படுகிறது.

ஒரே இடத்தில் பல பிரிவுகள்

புதிய வளாகத்தில் நகைகள், பர்னிச்சர், வீட்டு அலங்காரப் பொருட்கள், வீட்டு உபயோகப் பொருட்கள் உள்ளிட்ட பல்வேறு பிரிவுகளை ஒரே இடத்தில் கொண்டு வர திட்டமிடப்பட்டுள்ளதாக தகவல்கள் தெரிவிக்கின்றன.

இதன் மூலம் குடும்பத்துடன் வந்து பல்வேறு பொருட்களை ஒரே இடத்தில் வாங்கும் வகையில் பெரிய ரீடெயில் அனுபவத்தை உருவாக்க லெஜண்ட் சரவணா திட்டமிட்டுள்ளதாக கூறப்படுகிறது.

ரேடியல் சாலைக்கு கூடுதல் முக்கியத்துவம்

பல்லாவரம் முதல் துரைப்பாக்கம் வரையிலான ரேடியல் சாலை, விமான நிலையம், குடியிருப்பு பகுதிகள் மற்றும் முக்கிய தொழில் பகுதிகளை இணைக்கும் முக்கியமான சாலையாக உள்ளது.

இந்த பகுதியில் ஏற்கனவே பெரிய வணிக நிறுவனங்கள் செயல்பட்டு வரும் நிலையில், 15 லட்சம் சதுர அடி பரப்பளவிலான லெஜண்ட் சரவணா ஸ்டோர் வந்தால், அந்த பகுதியின் வணிக முக்கியத்துவம் மேலும் அதிகரிக்கும் என எதிர்பார்க்கப்படுகிறது.

சென்னையில் மிகப்பெரிய ரீடெயில் ஸ்டோர்களில் ஒன்றை உருவாக்கும் இந்த திட்டம், லெஜண்ட் சரவணாவின் அடுத்தகட்ட விரிவாக்கத்தில் முக்கியமானதாக பார்க்கப்படுகிறது.