புதிய தலைமைச் செயலகத்திற்கு இடம் பார்த்தாச்சு! வங்கக் கடல் அருகே 25 ஏக்கரில் 15 மாடி கட்டடம்!

தமிழ்நாட்டின் புதிய தலைமைச் செயலகம் மற்றும் சட்டமன்ற வளாகம் சென்னையின் பட்டினப்பாக்கம் அருகே உள்ள ஃபோர்ஷோர் எஸ்டேட் பகுதியில் அமையவுள்ளதாக தகவல் வெளியாகியுள்ளது. சுமார் 25 ஏக்கர் பரப்பளவில் பிரம்மாண்டமான 15 மாடி கட்டிடம் அமைக்க திட்டமிடப்பட்டுள்ளதாக தெரிவிக்கப்பட்டுள்ளது.

பட்டினப்பாக்கம் இடம் தேர்வானது எப்படி?

புதிய தலைமைச் செயலகத்துக்காக ஆரம்பத்தில் பட்டினப்பாக்கம் ஃபோர்ஷோர் எஸ்டேட், கிண்டியில் உள்ள நெடுஞ்சாலை ஆராய்ச்சி நிலைய வளாகம், நந்தம்பாக்கத்தில் ஃபின்டெக் சிட்டிக்கு எதிரே உள்ள அரசு நிலம் ஆகிய இடங்கள் பரிசீலிக்கப்பட்டதாக கூறப்படுகிறது.

இதில், நகரின் முக்கிய பகுதிகளுக்கு எளிதில் செல்லக்கூடிய வகையில் ஒரே இடத்தில் பெரிய அளவிலான அரசு நிலம் கிடைத்ததால் ஃபோர்ஷோர் எஸ்டேட் பகுதி தேர்வு செய்யப்பட்டதாக தகவல் வெளியாகியுள்ளது.

25 ஏக்கர்.. 15 மாடி.. 20 லட்சம் சதுர அடி!

புதிய தலைமைச் செயலகத்தின் பிரதான கட்டிடம் தரைத்தளத்துடன் சேர்த்து 15 மாடிகளைக் கொண்டதாக இருக்கும் என தெரிவிக்கப்பட்டுள்ளது.

கட்டிடத்தின் மொத்த கட்டுமானப் பரப்பு சுமார் 20 லட்சம் சதுர அடி என திட்டமிடப்பட்டுள்ளது. அனைத்து அரசுத் துறைகளையும் ஒரே வளாகத்தில் செயல்படுத்தும் வகையிலும், அரசு ஊழியர்கள் மற்றும் பொதுமக்களுக்கு நவீன வசதிகளுடன் அமைக்கவும் திட்டமிடப்பட்டுள்ளதாக கூறப்படுகிறது.

கட்டுமானத்துக்கு ரூ.1,200 கோடி?

இந்த புதிய வளாகத்தை கட்டுவதற்கான கட்டுமான செலவு சுமார் ரூ.1,200 கோடி என மதிப்பிடப்பட்டுள்ளதாக தகவல்கள் தெரிவிக்கின்றன.

அதேநேரத்தில், தேர்வு செய்யப்பட்டுள்ள நிலத்தின் வழிகாட்டி மதிப்பு மட்டும் சுமார் ரூ.2,047 கோடி என கணக்கிடப்பட்டுள்ளது. இதனால் நிலம் மற்றும் கட்டுமானம் உள்ளிட்ட திட்டத்தின் மொத்த மதிப்பு சுமார் ரூ.3,247 கோடி வரை இருக்கலாம் என மற்றொரு அறிக்கை தெரிவிக்கிறது.

இந்த நிலத்தின் பின்னணி என்ன?

புதிய தலைமைச் செயலகத்திற்காக தமிழ்நாடு வீட்டுவசதி வாரியத்துக்கு சொந்தமான சுமார் 21.37 ஏக்கர் நிலமும், சென்னை மாநகராட்சியின் கூடுதல் நிலமும் பயன்படுத்தப்பட உள்ளதாக தெரிவிக்கப்பட்டுள்ளது.

இந்த பகுதியில் கடந்த காலங்களில் அரசு ஊழியர்களுக்கான குடியிருப்புகள் இருந்துள்ளன. அவற்றில் பெரும்பாலானவை காலப்போக்கில் பழுதடைந்ததால் இடிக்கப்பட்டு, நிலம் காலியாக இருந்ததாக தகவல்கள் தெரிவிக்கின்றன.

புதிய தலைமைச் செயலகம் எப்போது?

தற்போது நிலத்தை பொதுப்பணித்துறை பயன்படுத்துவதற்கான ஆரம்பகட்ட அனுமதிகள் வழங்கப்பட்டுள்ளதாக தகவல்கள் வெளியாகியுள்ளன. அடுத்தகட்டமாக திட்டத்திற்கான நிர்வாக அனுமதி மற்றும் அதிகாரப்பூர்வ அரசாணை வெளியாகும் என எதிர்பார்க்கப்படுகிறது.

பல ஆண்டுகளாக செயின்ட் ஜார்ஜ் கோட்டை வளாகத்தில் செயல்பட்டு வரும் தமிழக அரசின் நிர்வாக மையம் புதிய இடத்திற்கு மாற்றப்படுவது, கட்டுமானம் மற்றும் நிர்வாக ரீதியாக பெரிய மாற்றமாக பார்க்கப்படுகிறது.

கடலோரப் பகுதியில் 25 ஏக்கர் நிலம்.. 15 மாடி பிரம்மாண்ட கட்டிடம்.. ரூ.1,200 கோடி கட்டுமான மதிப்பீடு என வெளியாகியுள்ள தகவல்கள், தமிழகத்தின் புதிய தலைமைச் செயலகத் திட்டத்தை அரசியல் மற்றும் நிர்வாக வட்டாரங்களில் முக்கிய பேசுபொருளாக மாற்றியுள்ளது.