புருனே சுல்தானின் தங்க மாளிகை... உலகிலேயே மிகப் பெரிய வீடு! உள்ளே என்னென்ன வசதிகள்?

தென்கிழக்கு ஆசிய நாடான புருனேயின் சுல்தான் ஹசனல் போல்கியா வசிக்கும் இஸ்தானா நுருல் இமான் (Istana Nurul Iman) அரண்மனை உலகிலேயே மிகப் பெரிய குடியிருப்பு மாளிகையாக கின்னஸ் உலக சாதனைப் புத்தகத்தில் இடம்பெற்றுள்ளது. 1984-ஆம் ஆண்டு கட்டி முடிக்கப்பட்ட இந்த பிரம்மாண்ட அரண்மனை, அரச குடும்பத்தின் இல்லமாக மட்டுமல்லாமல், புருனே அரசின் முக்கிய நிர்வாக மையமாகவும் செயல்பட்டு வருகிறது.

இந்த அரண்மனையின் பரப்பளவு சுமார் 21.5 லட்சம் சதுர அடி (2.15 million sq ft) ஆகும். இங்கு இருக்கும் அறைகள், மண்டபங்கள் மற்றும் சிறப்பு வசதிகள் உலகம் முழுவதும் ஆச்சரியத்தை ஏற்படுத்தியுள்ளன.

அரண்மனையில் என்னென்ன இருக்கிறது?

இஸ்தானா நுருல் இமான் அரண்மனையில் மொத்தம் 1,788 அறைகள் உள்ளன. அதில் 257 குளியலறைகள், ஒரே நேரத்தில் 5,000 பேர் அமரக்கூடிய பிரம்மாண்ட விருந்து மண்டபம், 1,500 பேர் தொழுகை நடத்தக்கூடிய மசூதி ஆகியவை இடம்பெற்றுள்ளன. மேலும், 110 கார் கேரேஜ்கள், சுல்தானின் 200 போலோ குதிரைகளுக்கான குளிர்சாதன வசதி கொண்ட லாயம், 5 நீச்சல் குளங்கள் உள்ளிட்ட பல ஆடம்பர வசதிகளும் உள்ளன.

அதுமட்டுமல்லாமல், இந்த மாளிகையில் 564 அலங்கார சரவிளக்குகள், 51,000 மின்விளக்குகள், 44 படிக்கட்டுகள் மற்றும் 18 லிப்ட்கள் அமைக்கப்பட்டுள்ளன. இதன் கட்டுமான வடிவமைப்பு மலாய் மற்றும் இஸ்லாமிய கட்டிடக்கலையை பிரதிபலிக்கும் வகையில் உருவாக்கப்பட்டுள்ளது.

பொதுமக்களுக்கு திறக்கப்படுமா?

பொதுவாக இந்த அரண்மனைக்கு பொதுமக்கள் அனுமதிக்கப்படுவதில்லை. ஆனால் ரமலான் நோன்பு பெருநாளான ஈத்-உல்-பித்ர் பண்டிகையையொட்டி ஆண்டுதோறும் சில நாட்களுக்கு அரண்மனை திறக்கப்படுகிறது. அந்த நாட்களில் ஆயிரக்கணக்கான மக்கள் சுல்தானை நேரில் சந்தித்து வாழ்த்து தெரிவிக்கும் வாய்ப்பைப் பெறுகின்றனர். வருகை தருபவர்களுக்கு உணவும், குழந்தைகளுக்கு பரிசுப் பணமும் வழங்கப்படும் என்பது அந்த நாட்டின் தனிச்சிறப்பாகும்.

உலகையே வியக்க வைத்த ஆடம்பரம்

புருனே உலகின் செல்வம் மிகுந்த நாடுகளில் ஒன்றாகக் கருதப்படுகிறது. எண்ணெய் மற்றும் இயற்கை எரிவாயு வளங்கள் மூலம் கிடைக்கும் வருவாயால் அந்த நாடு பெரும் பொருளாதார வளர்ச்சியை பெற்றுள்ளது. அதன் அடையாளமாகவே இந்த அரண்மனை பார்க்கப்படுகிறது.

உலகின் மிகப் பெரிய குடியிருப்பு மாளிகை என்ற பெருமையை பெற்றுள்ள இஸ்தானா நுருல் இமான், அதன் கட்டிடக்கலை, தங்க குவிமாடங்கள், பிரம்மாண்ட மண்டபங்கள் மற்றும் அரிய வசதிகளால் உலகம் முழுவதும் சுற்றுலாப் பயணிகள் மற்றும் கட்டிடக்கலை ஆர்வலர்களின் கவனத்தை ஈர்த்து வருகிறது.