தனுஷ்கோடி மீனவர் வலையில் "அந்த" பொருள்.. சீன பாக்கெட் பின்னணி? ஒரே நாளில் ராமநாதபுரத்தில் 2 மர்மம்

ராமநாதபுரம் மாவட்டம் தனுஷ்கோடி கடற்கரை பகுதியில் ஒரே நாளில் இரண்டு வித்தியாசமான சம்பவங்கள் கவனத்தை ஈர்த்துள்ளன. மீனவர் ஒருவரின் வலையில் சீன எழுத்துகள் கொண்ட குடிநீர் பாக்கெட்டுகள் சிக்கிய நிலையில், அதே பகுதியில் ஏராளமான பட்டன் ஜெல்லி மீன்களும் கரை ஒதுங்கியுள்ளன.

மீனவர் வலையில் சிக்கிய சீன பாக்கெட்டுகள்

தனுஷ்கோடி தென்கடல் பகுதியில் கடந்த சில நாட்களாக மர்மமான பொருட்கள் கடலில் மிதந்து வருவதாக மீனவர்கள் தெரிவித்துள்ளனர்.

இந்நிலையில், நேற்று அதிகாலை கரையோர மீன்பிடியில் ஈடுபட்டிருந்த பாரம்பரிய மீனவர் ஒருவரின் வலையில் சில பாக்கெட்டுகள் சிக்கியுள்ளன. அவற்றை கரைக்கு கொண்டு வந்து பார்த்தபோது, பாக்கெட்டுகளில் சீன எழுத்துகள் இருந்ததுடன், உள்ளே குடிநீர் இருந்ததும் தெரியவந்தது.

அவசர கால குடிநீர் பாக்கெட்டுகளா?

கடற்கரையில் கிடந்த நூற்றுக்கணக்கான பிளாஸ்டிக் பாக்கெட்டுகளை அதிகாரிகள் கைப்பற்றி ஆய்வு செய்துள்ளனர்.

அவற்றில் சீன நாட்டின் குடிநீர் தரக்குறியீடுகள் இடம்பெற்றிருந்ததாகவும்,

இவை அவசர காலங்களில் பயன்படுத்தப்படும் குடிநீர் பாக்கெட்டுகள் என தெரியவந்துள்ளதாகவும் தகவல்கள் தெரிவிக்கின்றன.

ஆனால் இந்த பாக்கெட்டுகள் எந்த கப்பல் அல்லது படகில் இருந்து கடலில் வந்தன என்பது இதுவரை உறுதி செய்யப்படவில்லை.

இலங்கை படகுகளா? சர்வதேச கப்பல்களா?

பாக்கெட்டுகள் காலாவதியான பிறகு இலங்கை கடற்படை படகுகள் அல்லது சர்வதேச வணிகக் கப்பல்களில் இருந்து கடலில் வீசப்பட்டிருக்கலாம் என்றும், கடல் நீரோட்டம் மற்றும் அலைகள் காரணமாக தனுஷ்கோடிக்கு வந்து சேர்ந்திருக்கலாம் என்றும் கூறப்படுகிறது.

இதுகுறித்து புலனாய்வு பிரிவு போலீசார் விசாரணை நடத்தி வருகின்றனர். எனவே, சீன பாக்கெட்டுகளின் உண்மையான பின்னணி என்ன என்பது விசாரணை முடிவில்தான் தெரியவரும்.

மற்றொரு மர்மம்.. குவிந்த பட்டன் ஜெல்லி மீன்கள்

இதே பகுதியில் ஏராளமான பட்டன் ஜெல்லி மீன்களும் கூட்டம் கூட்டமாக கரை ஒதுங்கியுள்ளன.

கடல் வெப்பநிலை, நீரோட்டம் மற்றும் உணவு கிடைக்கும் பகுதிகளில் ஏற்படும் மாற்றங்கள் காரணமாக இவை கரைப்பகுதிக்கு வந்திருக்கலாம் என கூறப்படுகிறது.

சில வகை ஜெல்லி மீன்களில் நச்சுத்தன்மை இருப்பதால், அவற்றை சுற்றுலாப் பயணிகள் கைகளால் தொடாமல் இருப்பது பாதுகாப்பானது.

கடல்வாழ் உயிரினங்களுக்கு ஆபத்தா?

நூற்றுக்கணக்கான பிளாஸ்டிக் குடிநீர் பாக்கெட்டுகள் கடலில் மிதப்பதால், அவற்றை கடல்வாழ் உயிரினங்கள் விழுங்கும் அபாயம் இருப்பதாக மீனவர்கள் கவலை தெரிவித்துள்ளனர்.

எனவே, கரை ஒதுங்கியுள்ள பாக்கெட்டுகளை அகற்றவும், அவை எங்கிருந்து வந்தன என்பது குறித்து விசாரணை நடத்தவும் அதிகாரிகள் நடவடிக்கை எடுக்க வேண்டும் என அவர்கள் கோரிக்கை விடுத்துள்ளனர்.

சீன எழுத்துகளுடன் கூடிய அவசர கால குடிநீர் பாக்கெட்டுகள் தனுஷ்கோடி வரை வந்தது எப்படி? அதே நேரத்தில் ஏராளமான பட்டன் ஜெல்லி மீன்கள் கரை ஒதுங்கியதற்கான காரணம் என்ன? என்ற இரண்டு கேள்விகளுக்கும் அதிகாரிகளின் விசாரணையில் விடை கிடைக்குமா என்பது எதிர்பார்ப்பாக உள்ளது.