மீனாட்சியம்மன் கோயில் குடமுழுக்கு.. 9 ஆயிரம் விஐபி பாஸ் கொடுங்க.. நேரடியாக கேட்ட நிர்மல்குமார்!

மதுரை மீனாட்சியம்மன் கோயிலில் 17 ஆண்டுகளுக்குப் பிறகு செப்டம்பர் 17-ம் தேதி குடமுழுக்கு விழா நடைபெற உள்ளது. லட்சக்கணக்கான பக்தர்கள் பங்கேற்பார்கள் என எதிர்பார்க்கப்படும் நிலையில், விழாவுக்கான விஐபி பாஸ்கள் தொடர்பாக புதிய சர்ச்சை எழுந்துள்ளது.

11 ஆயிரம் பாஸ்கள்.. 9 ஆயிரம் யாருக்கு?

குடமுழுக்கு விழாவுக்காக மொத்தம் 11 ஆயிரம் விஐபி பாஸ்கள் வழங்க திட்டமிடப்பட்டுள்ளதாக கூறப்படுகிறது. இதில் 9 ஆயிரம் பாஸ்களை அமைச்சர் சிடிஆர் நிர்மல்குமார் தரப்பு கேட்டதாக OneIndia செய்தி தெரிவிக்கிறது. இதனால் கோயில் நிர்வாகத்துக்கு சிக்கல் ஏற்பட்டுள்ளதாகவும் கூறப்படுகிறது.

வழக்கமாக கோயில் குடமுழுக்கு விழாக்களில் நன்கொடையாளர்கள், அரசு அதிகாரிகள், அரசியல்வாதிகள் மற்றும் விழா பணிகளில் ஈடுபடும் துறையினருக்கு விஐபி பாஸ்கள் வழங்கப்படுவது நடைமுறையாக உள்ளது.

தவெக எம்எல்ஏக்களும் பாஸ் கேட்டதாக தகவல்

இதற்கிடையே தவெக எம்எல்ஏக்களும் தங்களுக்கு குறிப்பிட்ட எண்ணிக்கையில் பாஸ்கள் வேண்டும் என கோரியதாக செய்தி கூறுகிறது. பல்வேறு துறைகளைச் சேர்ந்த அதிகாரிகளும் பாஸ்களை கேட்கும் நிலையில், ஒரே தரப்புக்கு ஆயிரக்கணக்கான பாஸ்கள் வழங்கப்பட்டால் எப்படி சமாளிப்பது என கோயில் நிர்வாகம் கவலை தெரிவித்ததாக கூறப்படுகிறது.

ஏற்கனவே சர்ச்சையில் சிக்கிய குடமுழுக்கு

மீனாட்சியம்மன் கோயில் குடமுழுக்கு அழைப்பிதழில் அறங்காவலர் குழுவினரின் பெயர்கள் இடம்பெறாதது, தமிழ் ஓதுவார்களின் பெயர்கள் இடம்பெறாதது உள்ளிட்ட விவகாரங்களும் ஏற்கனவே சர்ச்சையை ஏற்படுத்தியுள்ளன.

இந்த நிலையில், தற்போது விஐபி பாஸ்கள் விவகாரமும் பேசுபொருளாகியுள்ளதால், குடமுழுக்கு விழா ஏற்பாடுகளில் அரசியல் தலையீடு இருக்கிறதா? என்ற கேள்வியும் எழுந்துள்ளது.