விஜய் ஆட்சிக்கு வந்த பின் மட்டும்.. அரசு மதிப்பீட்டை விட குறைவான தொகைக்கு டெண்டர்.. எப்படி நடக்குது?

தமிழகத்தில் தவெக ஆட்சி அமைந்த பிறகு, அரசு நிர்ணயித்த மதிப்பீட்டைவிட குறைவான தொகைக்கு அடுத்தடுத்து முக்கிய டெண்டர்கள் எடுக்கப்பட்டிருப்பது அரசியல் மற்றும் பொதுவட்டாரங்களில் கவனத்தை ஈர்த்துள்ளது.

குறிப்பாக தாய்மாமன் தங்க மோதிரம் திட்டம் மற்றும் முதல்வர் அலுவலக புதுப்பிப்பு பணி ஆகிய இரண்டு டெண்டர்களும் தற்போது பேசுபொருளாகியுள்ளன.

ஒரு பைசா டெண்டர்.. ஜோய் ஆலுக்காஸ்

அரசு மருத்துவமனைகளில் பிறக்கும் குழந்தைகளுக்கு 1 கிராம் தங்க மோதிரம் வழங்கும் திட்டத்திற்கான டெண்டரில் 11 நிறுவனங்கள் பங்கேற்றதாக கூறப்படுகிறது.

இதில் ஜோய் ஆலுக்காஸ் நிறுவனம், தங்கத்தின் விலையைத் தவிர செய்கூலி, சேதாரம், ஹால்மார்க், பேக்கிங் உள்ளிட்ட செலவுகளை கணக்கில் கொண்டு ஒரு பைசா என டெண்டர் தொகையை குறிப்பிட்டதாக OneIndia செய்தி தெரிவிக்கிறது.

இந்த டெண்டர் 70:30 என்ற விகிதத்தில் ஜோய் ஆலுக்காஸ் மற்றும் கல்யாண் ஜுவல்லர்ஸ் நிறுவனங்களுக்கு வழங்கப்பட்டதாகவும் தெரிவிக்கப்பட்டுள்ளது.

ரூ.5.54 கோடி மதிப்பீடு.. ரூ.3.78 கோடிக்கு டெண்டர்

இதேபோல், நாமக்கல் கவிஞர் மாளிகையின் 10வது தளத்தில் முதல்வர் அலுவலகத்தை அமைக்கும் பணிக்காக அரசு தரப்பில் ரூ.5.54 கோடி மதிப்பீடு செய்யப்பட்டது.

இந்த டெண்டரில் 5 நிறுவனங்கள் பங்கேற்ற நிலையில், ராசி பில்டர்ஸ் நிறுவனம் அரசு மதிப்பீட்டைவிட சுமார் 32% குறைவாக, ரூ.3.78 கோடிக்கு டெண்டர் எடுத்ததாக OneIndia தெரிவித்துள்ளது.

எப்படி குறைந்த தொகைக்கு சாத்தியம்?

பொதுவாக போட்டி டெண்டர் முறையில் நிறுவனங்கள் தங்களது செலவு, லாபம் உள்ளிட்டவற்றை கணக்கிட்டு அரசு மதிப்பீட்டைவிட குறைவாகவும் தொகையை மேற்கோள் காட்ட முடியும்.

ஆனால், தொடர்ந்து முக்கியமான டெண்டர்கள் அரசு மதிப்பீட்டைவிட கணிசமாக குறைந்த தொகைக்கு கிடைப்பது எப்படி என்பது குறித்து கேள்விகள் எழுந்துள்ளன.

குறிப்பாக அரசு மதிப்பீடு எப்படி நிர்ணயிக்கப்பட்டது, நிறுவனங்கள் எப்படி அதைவிட குறைந்த தொகையில் பணியை மேற்கொள்ள முன்வருகின்றன, பணியின் தரம் பாதிக்கப்படாமல் இருப்பது எப்படி உறுதி செய்யப்படுகிறது? என்பவை முக்கியமான கேள்விகளாக உள்ளன.

இனி வரும் டெண்டர்களிலும் தொடருமா?

தாய்மாமன் தங்க மோதிரத் திட்டத்தைத் தொடர்ந்து முதல்வர் அலுவலக புதுப்பிப்பு பணியும் குறைந்த தொகைக்கு ஒப்பந்தம் செய்யப்பட்டுள்ளதாக கூறப்படும் நிலையில், இதேபோன்ற போட்டி இனி வரும் அரசு பணிகளிலும் தொடருமா என்ற எதிர்பார்ப்பு உருவாகியுள்ளது.

மேம்பாலம், சாலை உள்ளிட்ட பெரிய கட்டுமானப் பணிகளிலும் அரசு மதிப்பீட்டைவிட குறைவான தொகைக்கு நிறுவனங்கள் டெண்டர் எடுக்க முன்வருமா என்பதையும் பொறுத்திருந்து பார்க்க வேண்டியுள்ளது.

அரசுக்கு செலவை குறைக்கும் வகையில் குறைந்த தொகைக்கு டெண்டர் கிடைப்பது வரவேற்கத்தக்கதா? அல்லது இவ்வளவு குறைவான தொகையில் பணியின் தரம் மற்றும் நடைமுறை குறித்து கூடுதல் விளக்கம் தேவைப்படுகிறதா? என்பதே தற்போது எழும் முக்கிய கேள்வியாக உள்ளது.