அதே ஜெ. ஸ்டைல்.. மதுரவாயல் போல அண்ணா சாலை பாலமும் முடங்குகிறதா? நந்தனம் பாலப் பணியில் திடீர் சிக்கல்!

சென்னையின் முக்கிய போக்குவரத்து வழித்தடங்களில் ஒன்றான அண்ணா சாலையில், தேனாம்பேட்டை–சைதாப்பேட்டை இடையே அமைக்கப்பட்டு வரும் மேம்பாலப் பணியில் தற்போது புதிய சிக்கல் ஏற்பட்டுள்ளதாக தகவல்கள் வெளியாகியுள்ளன. நந்தனம்–தேனாம்பேட்டை பகுதியில் பணிகளைத் தொடர்வதில் வடிவமைப்பு தொடர்பான பிரச்சினை ஏற்பட்டுள்ளதால், திட்டம் தாமதமாகும் சூழல் உருவாகியுள்ளது.

சென்னையின் போக்குவரத்து நெரிசலை குறைக்கும் முக்கிய திட்டமாக பார்க்கப்பட்ட இந்த மேம்பாலப் பணிகள், 2024 ஜனவரியில் தொடங்கப்பட்டன. ஆனால், பணிகள் நடைபெற்று வந்த நிலையில் எதிர்பாராத தொழில்நுட்ப சிக்கல் ஏற்பட்டுள்ளது.

ரூ.621 கோடி திட்டத்தில் என்ன பிரச்சினை?

சுமார் ரூ.621 கோடி மதிப்பீட்டில், 4 வழிச்சாலையாக இந்த மேம்பாலம் அமைக்க திட்டமிடப்பட்டது. 2026 செப்டம்பருக்குள் பணிகளை முடிக்க முதலில் இலக்கு நிர்ணயிக்கப்பட்டிருந்தது.

சைதாப்பேட்டை முதல் நந்தனம் வரையிலான பகுதியில் ஏற்கனவே பல தூண்கள் அமைக்கப்பட்டுள்ளன. ஆனால் நந்தனம் முதல் தேனாம்பேட்டை வரையிலான பகுதியில் பணிகளை மேற்கொள்ளும்போது முக்கியமான வடிவமைப்பு சிக்கல் தெரியவந்ததாக கூறப்படுகிறது.

மெட்ரோ அடித்தளத்தால் ஏற்பட்ட சிக்கல்

நந்தனம்–தேனாம்பேட்டை பகுதியில் உள்ள நிலத்தடி மெட்ரோ ரயில் நிலையங்களின் அடித்தள அமைப்புகள், ஆரம்ப திட்டத்தில் கணிக்கப்பட்டதைப் போல நேர்கோட்டில் அமையவில்லை என்று கூறப்படுகிறது.

இதனால் சாலையின் நடுப்பகுதியில் வழக்கமான முறையில் மேம்பாலத் தூண்களை அமைப்பதில் சிக்கல் ஏற்பட்டுள்ளது.

மேலும், அண்ணா சாலையின் அகலம் எல்லா இடங்களிலும் ஒரே மாதிரியாக இல்லை. சில பகுதிகளில் சாலை அகலம் குறைவதால், நடுப்பகுதியில் தூண்களை அமைத்தால் கீழே செல்லும் வாகனங்களுக்கு கடுமையான போக்குவரத்து நெரிசல் ஏற்பட வாய்ப்பு இருப்பதாக அதிகாரிகள் கருதுகின்றனர்.

புதிய வடிவமைப்புக்கு மாற்றம்

இந்த பிரச்சினையை சமாளிக்க, ஏற்கனவே திட்டமிடப்பட்டிருந்த மையத் தூண்கள் முறைக்கு பதிலாக ‘Portal’ வகை தூண்கள் அமைக்கும் புதிய வடிவமைப்பு முன்வைக்கப்பட்டு ஒப்புதல் பெறப்பட்டுள்ளதாக தகவல் வெளியாகியுள்ளது.

இதன்படி, சாலையின் நடுவில் தூண்களை அமைப்பதற்கு பதிலாக சாலையின் இருபுறங்களிலும் தூண்கள் அமைத்து, அவற்றை மேல்பகுதியில் இணைக்கும் வகையில் புதிய கட்டமைப்பு உருவாக்கப்பட உள்ளது.

நந்தனம் மற்றும் தேனாம்பேட்டை மெட்ரோ நிலையப் பகுதிகளில் இந்த புதிய வடிவமைப்பின்படி சுமார் 45 பிரத்யேக தூண்கள் அமைக்கப்பட உள்ளதாக தெரிவிக்கப்பட்டுள்ளது.

காலக்கெடு நீட்டிப்பு

வடிவமைப்பில் மாற்றம் செய்ய வேண்டிய நிலை ஏற்பட்டுள்ளதால், இந்த மேம்பாலத்தின் பணிகள் ஏற்கனவே நிர்ணயிக்கப்பட்ட காலக்கெடுவுக்குள் முடிவடைவதில் சிக்கல் ஏற்பட்டுள்ளது.

தற்போதைய திட்டப்படி, பணிகள் 2027 பிப்ரவரி வரை நீட்டிக்கப்படலாம் என தகவல்கள் தெரிவிக்கின்றன.

இதனால், இன்னும் சில மாதங்களுக்கு அண்ணா சாலையில் போக்குவரத்து சிக்கல்கள் தொடரும் சூழல் உருவாகியுள்ளது.

வாகன ஓட்டிகளுக்கு தொடரும் சிரமம்

நந்தனம்–தேனாம்பேட்டை பகுதியில் மேம்பாலப் பணிகள் காரணமாக ஏற்கனவே போக்குவரத்து மாற்றங்கள் செய்யப்பட்டுள்ளன.

வாகனங்கள் தியாகராய நகர் போக் சாலை, விஜயராகவா சாலை மற்றும் செனடாப் சாலை போன்ற மாற்றுப் பாதைகளில் திருப்பி விடப்படுகின்றன.

இதனால் மாற்றுப் பாதைகளிலும் போக்குவரத்து நெரிசல் அதிகரித்து வருவதாக கூறப்படுகிறது. சாலைகளின் நிலை மற்றும் தொடரும் பணிகள் காரணமாக பொதுமக்கள் கூடுதல் நேரம் பயணம் செய்ய வேண்டிய சூழலும் ஏற்பட்டுள்ளது.