இலவச தட்கல் இணைப்புக்கு வசூலித்த ரூ.2,431 கோடி பணம் என்னாச்சு? மின்வாரியத்திடம் கோர்ட் சரமாரி கேள்வி

தமிழ்நாட்டில் விவசாயிகளுக்கு இலவச மின் இணைப்பு வழங்கும் திட்டத்தில், ‘தட்கல்’ முறையில் முன்னுரிமை பெறுவதற்காக விவசாயிகளிடம் வசூலிக்கப்பட்ட ரூ.2,431.51 கோடி தொடர்பாக மதுரை உயர் நீதிமன்ற கிளை முக்கிய கேள்விகளை எழுப்பியுள்ளது.

89 ஆயிரம் விண்ணப்பங்கள்

2021-22-ம் ஆண்டு முதல் தட்கல் திட்டத்தின் கீழ் 89,289 விவசாயிகள் விண்ணப்பித்துள்ளனர். இவர்களிடம் ரூ.2,431.51 கோடி வசூலிக்கப்பட்டதாக நீதிமன்றத்தில் தாக்கல் செய்யப்பட்ட மனுவில் தெரிவிக்கப்பட்டுள்ளது.

இதில் இதுவரை 44,993 விவசாயிகளுக்கு மின் இணைப்பு வழங்கப்பட்டுள்ளதாகவும், 44,296 பேர் இன்னும் காத்திருப்பதாகவும் குறிப்பிடப்பட்டுள்ளது.

“பணம் எதற்காக வசூலிக்கப்பட்டது?”

மதுரையைச் சேர்ந்த வழக்கறிஞர் செல்வகுமார் தாக்கல் செய்த பொதுநல மனுவில், தட்கல் முறையில் வசூலிக்கப்பட்ட தொகை எவ்வாறு பயன்படுத்தப்பட்டது என்பது குறித்து சிறப்பு தணிக்கை நடத்த வேண்டும் என கோரப்பட்டுள்ளது.

இந்த வழக்கை விசாரித்த நீதிபதிகள், “தட்கல் முறையால் ஏழை விவசாயிகள் பாதிக்கப்படமாட்டார்களா?” என கேள்வி எழுப்பினர். மேலும், விவசாயிகளிடம் இந்தத் தொகை எந்த அடிப்படையில் வசூலிக்கப்பட்டது, அதற்கான தணிக்கை விவரங்கள் என்ன என்பது குறித்து மின்வாரியம் மற்றும் நிதித்துறை அதிகாரிகளிடம் விளக்கம் கேட்டுள்ளனர்.

மின்வாரியம் பதில் அளிக்க உத்தரவு

வசூலிக்கப்பட்ட தொகையின் நோக்கம் மற்றும் பயன்பாடு குறித்து மின்வாரிய தலைவர் செப்டம்பர் 16-ம் தேதி பதில் மனு தாக்கல் செய்ய வேண்டும் என நீதிமன்றம் உத்தரவிட்டுள்ளது.

இதனால், இலவச விவசாய மின் இணைப்பு திட்டத்தில் தட்கல் முறையில் வசூலிக்கப்பட்ட ரூ.2,431 கோடி எவ்வாறு கையாளப்பட்டது என்பது தொடர்பான விவரங்கள் அடுத்த விசாரணையில் வெளியாகும் என எதிர்பார்க்கப்படுகிறது.