முதல்வர் விஜய்க்கே தெரியாமல் அரசாணை வந்ததா? ஆதவ் அர்ஜுனாவுக்கு பெ.சண்முகம் கேள்வி

சென்னை பட்டினப்பாக்கத்தில் புதிய தலைமைச் செயலகம் அமைப்பது தொடர்பாக தமிழக அரசின் அரசாணை வெளியாகியுள்ள நிலையில், இது தொடர்பாக மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகம் பல்வேறு கேள்விகளை எழுப்பியுள்ளார்.

பட்டினப்பாக்கத்தில் தலைமைச் செயலகம் அமைப்பது குறித்து முதலமைச்சர் விஜய் இன்னும் இறுதி முடிவு எடுக்கவில்லை என அமைச்சர் ஆதவ் அர்ஜுனா கூறியிருந்த நிலையில், அதற்கு பெ.சண்முகம் எதிர்ப்பு தெரிவித்துள்ளார். முதல்வர் இறுதி முடிவு எடுக்கவில்லை என்றால், தலைமைச் செயலகம் அமைய உள்ள இடம் தொடர்பாக அரசாணை எப்படி வெளியானது என்று அவர் கேள்வி எழுப்பியுள்ளார்.

அரசாணை முதலமைச்சருக்கு தெரியாமல் வெளியிடப்பட்டிருந்தால், அதற்கு காரணமான அதிகாரி மீது நடவடிக்கை எடுக்க வேண்டும் என்றும், முதலமைச்சரின் ஒப்புதலுடன்தான் அரசாணை வெளியானது என்றால், அந்த முடிவை மறுபரிசீலனை செய்து இடத்தை மாற்ற வேண்டும் என்றும் பெ.சண்முகம் தெரிவித்துள்ளார்.

பட்டினப்பாக்கம் பகுதியில் தலைமைச் செயலகம் அமைப்பதற்கு பதிலாக மாற்று இடங்களை பரிசீலிக்க வேண்டும் என்பதே தங்களது கோரிக்கை எனவும் அவர் கூறியுள்ளார். இது தவெகவுக்கு எதிரான அரசியல் போராட்டம் அல்ல என்றும், எந்த ஆட்சி இருந்தாலும் இதே கோரிக்கையை தாங்கள் முன்வைப்போம் என்றும் பெ.சண்முகம் தெரிவித்துள்ளார்.

மேலும், சென்னையில் பல்வேறு அரசு நிலங்கள் மற்றும் மாற்று இடங்கள் இருக்கும் நிலையில், பட்டினப்பாக்கத்தில் மீனவர்களின் வாழ்வாதாரத்தை பாதிக்கும் வகையில் தலைமைச் செயலகம் அமைப்பது குறித்து மறுபரிசீலனை செய்ய வேண்டும் என அவர் வலியுறுத்தியுள்ளார்.

இதற்கிடையே, பட்டினப்பாக்கத்தில் புதிய தலைமைச் செயலகம் அமைப்பது தொடர்பான அரசாணையில் 25.55 ஏக்கர் நிலத்தில், சுமார் ரூ.1,200 கோடி மதிப்பில் திட்டம் செயல்படுத்தப்பட உள்ளதாகவும், அதற்கான முதற்கட்ட கொள்கை ஒப்புதல் வழங்கப்பட்டுள்ளதாகவும் எதிர்க்கட்சிகள் சுட்டிக்காட்டி வருகின்றன.

இதனால், புதிய தலைமைச் செயலகம் அமைப்பது தொடர்பான அரசின் முடிவு, அரசாணை வெளியிடப்பட்ட விதம் மற்றும் அமைச்சர் ஆதவ் அர்ஜுனாவின் விளக்கம் ஆகியவை குறித்து அரசியல் விவாதம் தீவிரமடைந்துள்ளது. இந்த விவகாரத்தில் அரசு தரப்பில் மேலும் விளக்கம் வெளியாகுமா என்பதும் கவனத்தை பெற்றுள்ளது.