அரசு டெண்டர்களில் நடந்த மாற்றம்.. ஆண்டுக்கு ரூ.60,000 கோடி வரை சேமிக்க முடியும்.. அறப்போர் இயக்கம் தகவல்

தமிழ்நாடு அரசின் டெண்டர் முறையில் ஏற்பட்ட மாற்றங்களால், அரசு பணிகளுக்கான போட்டி அதிகரித்து திட்டச் செலவில் 30% வரை சேமிப்பு ஏற்படுவதாக தகவல் வெளியாகியுள்ளது.

நகராட்சி நிர்வாகம் மற்றும் குடிநீர் வழங்கல் துறை சார்பில் சாலை அமைத்தல், குடிநீர் திட்டங்கள் உள்ளிட்ட பணிகளுக்காக 1,000-க்கும் மேற்பட்ட டெண்டர்கள் விடப்பட்டுள்ளன. சில டெண்டர்களில் 10 ஒப்பந்ததாரர்கள் வரை போட்டியிட்டதால், குறைந்த விலையில் பணிகளை மேற்கொள்ளும் நிலை உருவாகியுள்ளது.

ரூ.60,000 கோடி சேமிக்க முடியுமா?

அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் கூறுகையில், தமிழக அரசு ஆண்டுதோறும் சுமார் ரூ.3 லட்சம் கோடி மதிப்பிலான டெண்டர்களை வெளியிடுவதாகவும், அதில் 20% வரை சேமிப்பு ஏற்பட்டால் ஆண்டுக்கு சுமார் ரூ.60,000 கோடி சேமிக்க முடியும் என்றும் தெரிவித்துள்ளார்.

சில டெண்டர்களில் திட்ட மதிப்பை விட குறைவான விலையில் ஒப்பந்ததாரர்கள் போட்டியிடுவது, முன்பு திட்ட மதிப்பீடுகள் அதிகமாக நிர்ணயிக்கப்பட்டிருக்கலாம் என்பதையும் காட்டுகிறது என அறப்போர் இயக்கம் தெரிவித்துள்ளது.

அதே நேரத்தில், இந்த மாற்றம் மூலம் ஒப்பந்ததாரர்களின் கூட்டணி முற்றிலும் தடுக்கப்பட்டுவிட்டது என்று இப்போதே கூற முடியாது என்றும் அறப்போர் இயக்கம் எச்சரித்துள்ளது.

டெண்டர் முறையில் அதிக போட்டி உருவானால் அரசுக்கு பெரிய அளவில் பணம் மிச்சமாகும் என்பதால், இந்த நடைமுறை தொடர்ந்து கண்காணிக்கப்பட வேண்டும் என்பதே முக்கியமாகிறது.