திமுக ஆட்சியில் விவசாயிகள், ஆசிரியர்கள் மீது பதியப்பட்ட வழக்குகள் ரத்து.. முதல்வர் விஜய் அதிரடி அறிவிப்பு!
தமிழ்நாட்டில் 2021 மே முதல் 2026 ஏப்ரல் வரை தங்களது உரிமைகள் மற்றும் நியாயமான கோரிக்கைகளுக்காக அமைதியான முறையில் போராடிய விவசாயிகள் மற்றும் ஆசிரியர்கள் மீது பதிவு செய்யப்பட்ட அனைத்து வழக்குகளையும் திரும்பப் பெறுவதாக முதல்வர் விஜய் சட்டப்பேரவையில் அறிவித்துள்ளார்.
விவசாயிகள் மீதான வழக்குகள்
திருவண்ணாமலை மாவட்டம் சிப்காட் தொழிற்பேட்டை திட்டத்திற்கு எதிராக போராடிய விவசாயிகள் மீதும், பரந்தூர் விமான நிலையத் திட்டத்திற்கு எதிராக போராடிய விவசாயிகள் மீதும் வழக்குகள் பதிவு செய்யப்பட்டிருந்தன.
சில விவசாயிகள் மீது குண்டர் தடுப்புச் சட்டமும் பயன்படுத்தப்பட்டிருந்த நிலையில், அவை தொடர்பான வழக்குகளையும் திரும்பப் பெற அரசு முடிவு செய்துள்ளதாக முதல்வர் விஜய் தெரிவித்துள்ளார்.
ஆசிரியர்களுக்கும் வழக்குகள் ரத்து
தங்களின் நியாயமான கோரிக்கைகளை வலியுறுத்தி அமைதியான முறையில் போராடிய ஆசிரியர்கள் மீது பதிவு செய்யப்பட்ட வழக்குகளும் இந்த நடவடிக்கையின் கீழ் திரும்பப் பெறப்படும் என அறிவிக்கப்பட்டுள்ளது.
மனிதநேய அடிப்படையிலும், ஜனநாயகக் கொள்கைகளின் அடிப்படையிலும் இந்த முடிவு எடுக்கப்பட்டுள்ளதாக முதல்வர் விஜய் தெரிவித்துள்ளார்.
“ஜனநாயக உரிமைகளை மதிக்கிறோம்”
விவசாயிகள் மற்றும் ஆசிரியர்களின் ஜனநாயக உரிமைகளை அரசு மதிப்பதாகவும், அவர்களின் நியாயமான கோரிக்கைகளுக்கு அரசு உறுதுணையாக இருக்கும் என்றும் விஜய் தெரிவித்துள்ளார்.
இந்த அறிவிப்பு, விவசாயிகள் மற்றும் ஆசிரியர்கள் மத்தியில் வரவேற்பை பெறும் என எதிர்பார்க்கப்படுகிறது.
Comments