விஜய்யின் ‘வீழ்ச்சி’யை கணித்துவிட்டார்களா மாஜிக்கள்? இசக்கி சுப்பையாவின் முடிவு உணர்த்தும் அபாய மணி

அதிமுகவில் இருந்து விலகி, தங்களது எம்.எல்.ஏ பதவிகளை ராஜினாமா செய்துவிட்டு தமிழக வெற்றிக் கழகத்தில் இணைந்த முன்னாள் எம்.எல்.ஏக்களின் அரசியல் எதிர்காலம் தற்போது கேள்விக்குறியாகியுள்ளதாக அரசியல் வட்டாரங்களில் பேசப்படுகிறது.

அம்பாசமுத்திரம் முன்னாள் எம்.எல்.ஏ இசக்கி சுப்பையா, தான் ஏற்கனவே கொடுத்த ராஜினாமா கடிதத்தை திரும்பப் பெற அனுமதிக்க வேண்டும் என சபாநாயகரிடம் மனு அளித்ததாகவும், இதுதொடர்பான கோரிக்கையை நீதிமன்றம் பரிசீலிக்க வேண்டும் எனவும் கோரியிருந்தார். ஆனால், இந்த கோரிக்கையை சென்னை உயர் நீதிமன்ற டிவிஷன் பெஞ்ச் ஏற்க மறுத்துள்ளது.

தவெகவில் சீட் கிடைக்காத அச்சமா?

அதிமுகவில் இருந்து தவெகவுக்கு வந்த முன்னாள் எம்.எல்.ஏக்களில் பலருக்கும் மீண்டும் தேர்தலில் போட்டியிட வாய்ப்பு கிடைக்குமா என்ற கேள்வி எழுந்துள்ளது. குறிப்பாக, புதியவர்களுக்கும் இளைஞர்களுக்கும் முன்னுரிமை அளிக்க விஜய் திட்டமிட்டுள்ளதாக கூறப்படும் நிலையில், பழைய அரசியல் முகங்களுக்கு தொகுதி கிடைப்பது உறுதியில்லை என அரசியல் பார்வையாளர்கள் கூறுகின்றனர்.

இதனால் பதவியை ராஜினாமா செய்து தவெகவில் இணைந்த முன்னாள் எம்.எல்.ஏக்கள் சிலர் தங்களது அரசியல் எதிர்காலம் குறித்து மறுபரிசீலனை செய்யத் தொடங்கியிருக்கலாம் என்ற கருத்தும் முன்வைக்கப்படுகிறது.

விஜய்க்கு இது அபாய மணியா?

இசக்கி சுப்பையாவின் நடவடிக்கையை வைத்து, தவெகவில் இணைந்த முன்னாள் எம்.எல்.ஏக்கள் மத்தியில் அதிருப்தி ஏற்பட்டுவிட்டதாக உறுதியாக கூற முடியாது. ஆனால், புதிய கட்சியில் இணைந்த பிறகு தங்களது அரசியல் எதிர்காலம் எப்படி இருக்கும் என்ற கவலை அவர்களுக்கு இருப்பதை இந்த விவகாரம் வெளிப்படுத்துவதாக அரசியல் ஆய்வாளர்கள் கருதுகின்றனர்.

மேலும், ரசிகர் கூட்டத்தையும் அரசியல் வாக்கு வங்கியையும் ஒன்றாக பார்க்க முடியாது என்பதால், தவெக தனது அமைப்பு மற்றும் தேர்தல் கட்டமைப்பை எவ்வாறு வலுப்படுத்துகிறது என்பதே அடுத்தகட்டத்தில் முக்கியமாக பார்க்கப்படும் விஷயமாக உள்ளது.

இசக்கி சுப்பையாவின் இந்த நடவடிக்கை தனிப்பட்ட சட்டப் போராட்டமா அல்லது தவெக மீது ஏற்பட்ட அரசியல் நம்பிக்கையின்மையின் அறிகுறியா? என்பது தான் தற்போது அரசியல் வட்டாரங்களில் எழும் முக்கிய கேள்வியாக உள்ளது.