சர்ருனு ஏறுது சர்க்கரை விலை.. இதுல இது வேறயா! பெரிய பிரச்சினை ஆயிடும்! தமிழக அரசுக்கு பறந்த கோரிக்கை

தமிழ்நாட்டில் சர்க்கரை விலை தொடர்ந்து உயர்ந்து வரும் நிலையில், நாட்டில் சர்க்கரைக்கு கடுமையான தட்டுப்பாடு நிலவும் சூழலும் உருவாகியுள்ளதாக தகவல்கள் வெளியாகியுள்ளன. இதனால் வரும் நாட்களில் சர்க்கரை விலை மேலும் அதிகரிக்கும் அபாயம் இருப்பதாகவும் கூறப்படுகிறது.

கூட்டுறவு சர்க்கரை ஆலை குறித்து கேள்வி

தமிழ்நாட்டில் உள்ள பொதுத்துறை, கூட்டுறவு மற்றும் தனியார் சர்க்கரை ஆலைகளில் அக்டோபர் 1-ம் தேதி முதல் அரவைப் பருவம் தொடங்க உள்ளது. ஆனால், செங்கல்பட்டு மாவட்டம் படாளத்தில் உள்ள மதுராந்தகம் கூட்டுறவு சர்க்கரை ஆலையில் ஒப்பந்த பணியாளர் நியமனம் உள்ளிட்ட பணிகள் இன்னும் தொடங்கவில்லை என பாமக தலைவர் அன்புமணி ராமதாஸ் தெரிவித்துள்ளார்.

தமிழக அரசுக்கு கோரிக்கை

சர்க்கரை தட்டுப்பாடு மற்றும் விலை உயர்வை கருத்தில் கொண்டு, மதுராந்தகம் கூட்டுறவு சர்க்கரை ஆலையை உடனடியாக செயல்பாட்டுக்கு கொண்டு வர வேண்டும் என்று அன்புமணி ராமதாஸ் தமிழக அரசை வலியுறுத்தியுள்ளார்.

மேலும், சர்க்கரை உற்பத்தியை அதிகரிக்க கூட்டுறவு ஆலைகளின் செயல்பாடுகளை அரசு தீவிரப்படுத்த வேண்டும் என்றும் அவர் கோரிக்கை விடுத்துள்ளார்.

சர்க்கரை விலை எவ்வளவு?

தமிழ்நாட்டில் சமீபத்தில் சர்க்கரை விலை கிலோ ரூ.75 முதல் ரூ.80 வரை உயர்ந்துள்ளதாக அன்புமணி தெரிவித்துள்ளார். வரும் தீபாவளி காலத்தில் இது ரூ.100-ஐ எட்டும் அபாயம் இருப்பதாகவும் வணிகர்கள் தெரிவித்துள்ளதாக கூறப்பட்டுள்ளது.

இதற்கிடையில், மக்களின் சுமையை குறைக்க ரேஷன் கடைகளில் கூடுதல் சர்க்கரை வழங்க வேண்டும் என்ற கோரிக்கையும் எழுந்துள்ளது.